Gratulations-Väärsli im Drummeli am Frytig, 12. Hoornig 1999

S git allewyyl no Dail, wo lyyslig schimpfe,

und iber Gugge iiri Naase rimpfe,

wo maine, aigedlig nuur Piccolo

und Drummle syyge wirgglig rächti Muusig,

und alles andere syg eender gruusig...

Daas mien mer emol richtig stelle doo!

Wäär nämmlig d Pumperniggel gheert het schränze

und mit däm wunderscheenen Uffdritt glänze,

het wider emol gspyyrt und gsee und gheert,

dass d Muusig, won e dääwääg fägt und gwittered,

dass me vom Toupaet bis zer Soole zittered,

zem beschte Käärn vo unserer Faasnacht gheert.

Wenn d Pumperniggel tschäddere und bloose

in iire Kilt und in iire Bajass-Hoose,

wenn sy im glassisch.schiefe Zämmespiil

mit Paugge, Bleeser, Eergeli und Gyyge

e ganze Monschter-Saal dien iiberzyyge,

denn muess me saage: Daas het Foorm und Stiil!

Sy gheere hit zem Suurdaig vo de Gugge.

Sy sinn au die, wo mit de Baggemugge

die "IG Gugge" zämme grindet hänn. glauben au, es wuurd sich wirgglig loone,

dass mer de scheene, alte Traditioone

vo unserer Faasnacht non e Chance gänn.

Y waiss nid, wie mer z Baasel Faasnacht mieche

ooni so gueti, glatti, liebi Sieche.

Mer winschten is vo dääre Sorte mee.

Und wenn sy jetzt dr Fuffzigscht zelebriere,

wämmer de Pumperniggel gratuliere.

Und zwoor vo Häärze!

 S Fasnachts-Comité