Liebi Pumperniggel, es isch wiider emool sehr scheen gsii mit Euch Fasnacht z'mache, y freu my scho uffs näggschte Joor.

Y gratulier de Nuggisuuger niit nur zem Jubiläum sondern au zue däm Fescht. Es isch fiir uns e tolle, guete Ufftritt gsii und es het sehr Spass gmacht. D'Pumperniggel hänn wiideremool gschränzt, dass sich d'Balgge biege.

E schöne Dagg isches gsii, e Bsundere,
Gmundet het die gueti Flundere.
Die digitali Bestellig isch dr Hit.
kasch sicher sy dass es nägscht Johr nomee Lyt git.
E Zigärli bii Sunneschyn und Wasserfahrer, was wilsch mee,
gruederet hänn sy wie die Wilde das hämmer gsee.
E gmietligge Noomidaag in gueter Gsellschaft,
isch das was dä Aaloss Ussmacht.

Nöggi

Hallo Zämme,
am 18.06.16 hämmer dörfe an dr Erleschittlete bii de Stachelbeeri e Ständeli bringe. Es het sich wiideremool bywoorheitet dass Qualität niit unbedingt muess Quantität ussmache. Es isch e tolle Ufftritt gsii, wo miir yss wieder e mool hänn können zeige. Fantastisch liebi Pumperniggel

Z'Muttenz im Pfadiheim hämmer dörfe im Beat e Ständeli bringe. Är het das mit Bier und Grillade verdankt! Mr hänn derfe e gmietligge Noomidaag bii iim vrbringe. Noonemool vyyle Dangg Beat und dass de no lang mit uns musiziere kasch.

Warte uff s‘Finaale


Jetzt äntligg isches doo,
was y main, dängg s’Gribble im Buuch, heyoo

mänggmool duurts e Bitzi länger als me dänggt
doch hets au das Joor wiider uff d‘Fasnacht glänggt.

E Uff und Abb, wies Lääbe halt esoo duet spiile,
me gseht das au wenn me uff vergangeni Joor duet schiile.

Dien mr yss doch jetzt uff’s Kommendi konzentriere,
nämmligg uff d’Fasnacht und dien drbyy kai Zyt verliere.

Die drey scheenschte Dääg steen vor dr Diire,
fiir d’Marschproob nämme mr s‘Instrumänt nomool hindefiire.

Los wie‘s deent, s’isch aifach gail,
jetzt nuur niit muudere, blyb aifach hail.

Damit die Fasnacht denn au gniesse duesch,
und sy niit dehai verbringe muesch.

Y frai my schuurig jetzt uff’s Halbfinale in Baar Luzärn,
denn Schränze mit de Pumperniggel dueni gärn.

Und luegsch voruss, gseesch wie s’Liecht am Horizont duet schyyne
Kasch alles vergässe, muesch nüt und niemerem me nochgryyne.

D’Räppli donnere durch d’Luft uff d’Kabbe,
dr Waggis hett persee e grossi Klabbe.

Lägg isch das e Gfiel, y mechts niit Miisse,
wärsch am Schaffe wärs beschiisse.

Wenn dr Duft vo dr Frau Fasnacht yyne zyesch,
und wenn denn d’Auge drnoo zue miechsch.

Denn gschbiirsch die einzigartig Seeligkeit,
drey Daag lang, s’kunnt dr vor als Eewigkeit.

Gseesch dr Waggis wiener duet intregiere,
und s’Tante Röösli graad e Brotwurscht duet probiere.

Hebsch dy Zingge in d’Heechi, schmeggsch dä einzigartig Duft,
vo Määlsuppe, Ziibelewaie, denn s’liggt Fasnacht in dr Luft.

Was giits denn schöners uff dääre Muetter Äärde,
as wenn an de drey scheenschte Dääg kasch seelig wäärde.

D’Frau Fasnacht isch halt ebbe wunderscheen in iirem farbige Klaid,
dient sy mit mr fyyre, händ s’glatt und wär’s niit kaa dä duet mr laid.

Nöggi, 01.02.2016